***** ਹੁਣ ਜਮਾਨਾ ਲੰਘ ਗਿਆ , ਨਿੱਕਿਆ *****
ਡੈਕਾਂ ਚ ਬੈਲਟਾਂ, ਮੋਟਰਾਂ ਤੇ ਰੂਲੇ ਪਵਾਉਣ ਦਾ,
ਪਰਾਲੀ ਦੇ ਢੇਰ ਤੇ ਛਾਲਾਂ ਮਾਰਨ ਦਾ,
ਪਤੰਗ ਲੁੱਟਦੇ-ਲੁੱਟਦੇ ਨਾਲਦੇ ਪਿੰਡਾਂ ਚ ਪਹੁੰਚ ਜਾਣ ਦਾ,
ਘਲਾੜੀ ਤੇ ਬਹਿ ਕੇ ਤੱਤ-ਤੱਤਾ ਗੁੜ ਖਾਣਾ, ਨਾਲ ਨੂੰ ਦਸ ਬਾਰਾਂ ਗੰਨੇ, ਘਰ ਨੂੰ ਲਿਆਉਣ ਦਾ,
ਬੁਰਾ ਨੀ ਮਨਾਉਣਾ , ਪਿੰਡ ਦੇ ਸਿਆਣੇ ਬੰਦੇ ਦੀ ਘੂਰ ਦਾ,
ਆਪ ਨਾਉਣਾ ਤੇ ਟੋਹਬੇਆਂ ਚ ਮਈਆਂ ਨੂੰ ਨਵਾਉਣ ਦਾ,
ਸ਼ਹਿਰੋਂ ਆਉਣ ਲੱਗੇ ਸਮੋਸੇ ਲਿਆਉਣ ਦਾ,
ਮਖਾਣੇ ਪਕੌੜੀਆਂ ਚ ਰਲਾਕੇ ਖਾਣ ਦਾ,
ਅੱਠ ਵੱਜਦੇ ਨੂੰ ਰੋਟੀ-ਟੁੱਕ ਖਾ ਕੇ ਸੌਂ ਜਾਣ ਦਾ ,,,,,
ਕੈਂਚੀ ਸੈਕਲ ਸਿਖਣ ਲੱਗੇ ਰਗੜਾਂ ਲਵਾਉਣ ਦਾ,
ਜਲੰਧਰ ਤੋਂ ਸਾਢ਼ੇ ਸੱਤ ਆਲੀਆਂ ਰਮਨ ਦੀਆਂ ਖਬਰਾਂ ਦਖਾਉਣ ਦਾ,
ਰੇੜੂਏ ਦੇ ਸੈੱਲ ਧੁੱਪੇ ਰੱਖ ਕੇ ਚਾਰਜ ਕਰਨ ਦਾ,
ਡੀਡੀ-ਟੂ ਆਲੀ ਛੱਤਰੀ ਲਵਾਉਣ ਦਾ,
ਬੀ ਸੀ ਆਰ ਕਰਾਏ ਤੇ ਲਿਆਉਣ ਦਾ,
ਫਿਲਮੀ ਗੀਤ ਚਿਤਰਹਾਰ ਦੇਖਣ ਦਾ,
ਰਾਹ ਚ ਸ਼ਰਾਬੀ ਪਏ ਬੰਦੇ ਨੂੰ ਚੱਕ ਕੇ ਉਹਦੇ ਘਰ ਛੱਡ ਕੇ ਆਉਣ ਦਾ,
ਬਰਸੀਮ ਦੀਆਂ ਡੰਡੀਆਂ ਨੂੰ ਮੂਹਰੋੰ ਚਿੱਬ ਕੇ , ਪੀਪਣੀਆਂ ਬਣਾਉਣ ਦਾ,
ਔਲੂ ਚ ਨੱਕ ਬੰਦ ਕਰਕੇ ਲੰਬੀ ਤੋਂ ਲੰਬੀ ਚੁੱਭੀ ਲਾਉਣ ਦਾ,
ਰਪੀਏ ਦੀਆਂ ਚਾਰ ਗੁੱਟੀਆਂ ਦੀ ਡੋਰ ਲਿਉਣ ਦਾ,
ਗੁਆਂਡੀਆਂ ਦੇ ਘਰੋਂ ਚੋਰੀ ਮਰੂਦ ਤੋੜ ਕੇ , ਭੱਜ ਜਾਣ ਦਾ,
ਮੀਂਹ ਪੈਂਦੇ ਚ ਬੀਹੀਆਂ ਚ ਭੱਜ-ਭੱਜ ਕੇ ਨਾਉਣ ਦਾ,
ਬਾਪੂ ਦੇ ਸੈਕਲ ਦੇ ਮੂਹਰਲੇ ਡੰਡੇ ਤੇ ਬੈਠ ਕੇ ਝੂਟੇ ਲੈਣ ਦਾ,
ਮੋਮ ਜਾਮੇ ਦੇ ਪਤੰਗ ਬਣਾ ਕੇ ਉਡਾਉਣ ਦਾ,
ਵੱਡੇ ਗਏ ਪਤੰਗ ਆਲੇ ਦੀ ਲੁਕ ਕੇ ਡੋਰ ਲੁੱਟਣ ਦਾ,
ਖੱਤਿਆਂ ਚੋਂ ਚਿੱਬੜ ਲੱਭ ਕੇ ਖਾਣ ਦਾ,
ਅਨਟੀਨਾ ਘੁਮਾ-ਘੁਮਾ ਕੇ ਟੈਲੀਬੀਜਨ ਦਾ ਟੇਸ਼ਨ ਸੈੱਟ ਕਰਨ ਦਾ,
ਆਉਂਦੇ ਜਾਂਦੇ ਹਰ ਸਿਆਣੇ ਬੰਦੇ ਨੂੰ ਉਚੀ ਦੇਕੇ, ਸਤਿ ਸ੍ਰੀ ਅਕਾਲ ਬਲਾਉਣ ਦਾ,
ਗੁਰਦੁਆਰੇ ਚੋਂ ਦੂਹਰੀ-ਤੀਹਰੀ ਵਾਰ ਭੋਗ ਲੈਣ ਦਾ,
ਧਮਕ ਆਲੇ ਬੋਫਰ ਸਪੀਕਰਾਂ ਦੇ ਪੜਦੇ ਪਵਾਉਣ ਦਾ,
ਗਵੰਤਰੀ ਨੂੰ ਰੇਹੜੀ ਤੇ ਖੜਾਅ ਕੇ, ਅਖਾੜਾ ਲਵਾਉਣ ਦਾ,
ਵਿਆਹਾਂ ਚ ਕਣਾਤਾਂ ਲਾਉਣ ਦਾ,
ਵਿਆਹ ਵੇਲੇ ਮੰਜੇ ਬਿਸਤਰੇ ਕੱਠੇ ਕਰ ਕੇ ਲਿਆਉਣ ਦਾ,
ਜੰਨ ਆਲੀ ਕਾਰ ਦੇ ਮੂਹਰੋੰ ਪੈਹੇ ਲੁੱਟਣ ਦਾ,
ਵਿਆਹਾਂ ਦੇ ਵਿਚ ਨਚਾਰਾਂ ਦੇ ਨੱਚਣ ਦਾ,
ਰੋਟੀ ਚ ਚੀਨੀ ਲਵੇਟ ਕੇ ਪੂਣੀ ਬਣਾ ਕੇ ਘਰੋ ਭੱਜਦੇ-ਭੱਜਦੇ ਖਾਣ ਦਾ,
ਬਾਂਟੇ ਜੇਬ ਚ ਪਾਕੇ ਖੜਕਾਉਣ ਦਾ,
ਸਕੂਲ ਚ ਘਰੋਂ ਬੋਰੀਆਂ-ਥੈਲੇ ਲਿਆਕੇ ,ਬੈਠਣ ਦਾ,
ਡੈਕ ਦੀ ਰੀਲ ਕਿਸੇ ਤੋਂ ਮੰਗਵੀਂ ਲਿਆਕੇ ,ਸੁਣਨ ਦਾ,
ਵਰਕੇ ਤੇ ਚੁਣਵੇਂ-ਚੁਣਵੇਂ ਗੀਤ ਲਿਖਕੇ ,ਗੀਤ ਭਰਾਉਣ ਦਾ,
ਵਿਹੜੇਆਂ ,ਕੋਠੇਆਂ ਨੂੰ ਗੋਹੇ ਮਿੱਟੀ ਤੂੜੀ ਨਾਲ ਲਿੱਪਣ ਦਾ,
ਖੂਹਾਂ ਤੋਂ ਪਾਣੀ ਭਰਕੇ ਲਿਆਉਣ ਦਾ,
ਇੱਕੋ ਕੱਠੇ ਪਰਿਵਾਰਾਂ ਦੇ ਰਲਕੇ ਰਹਿਣ ਦਾ,
ਬੌਲਦਾਂ ਦੇ ਨਾਲ ਖੇਤੀ ਕਰਨ ਦਾ,
ਪਿੰਡ ਦੇ ਬਾਹਰੋਂ ਕਿਤੋਂ ਦੂਰੋਂ ਖੇਤ ਚੋਂ , ਪੀਟਰ ਈਂਜਣ ਦੀ ਆਵਾਜ, ਠੱਕ ਠੱਕ ਕਰਕੇ ਆਉਣ ਦਾ,
ਭਰਮਾਂ ਰੁੱਗ ਲਾਕੇ ਟੋਕੇ ਆਲੀ ਮਸ਼ੀਨ ਨੂੰ ਕੱਲੇ ਹੱਥ ਨਾਲ ਗੇੜਨ ਦਾ,
ਬੈਗੀ ਪੈਂਟਾਂ ਜਾਂ ਖੁੱਲੀ ਮੂਹਰੀ ਆਲੀ ਪੈੰਟ ਸਵਾਉਣ ਦਾ,
ਦਰਜੀ ਨੂੰ ਕਹਿਕੇ ਪੈੰਟ ਅੰਦਰ ਚੋਰ ਜੇਬ ਲਵਾਉਣ ਦਾ,
ਬਿਨਾ ਦੱਸੇ ਘਰੋਂ ਚੋਰੀ , ਸਿਨਮੇ ਜਾਕੇ ਫਿਲਮਾਂ ਦੇਖਣ ਦਾ,
ਜਦੋਂ ਖੇਡਣ ਨੂੰ ਦਿਲ ਨਾ ਕਰੇ , **ਕੇ, ਬਾਈ ਅੱਜ ਤਾਂ ਹਾਰ ਆ** ,, ਕਹਿਣ ਦਾ,
ਪੈਹਲ , ਦੁੱਗ , ਤਿੱਗ , ਅਤੇ ਫਾਡੀ ਆਉਣ ਦਾ,
***** ਹੁਣ ਜਮਾਨਾ ਲੰਘ ਗਿਆ , ਨਿੱਕਿਆ *****
Author: Gagan Masoun